ڈاکٹر سیدہ نسیم سلطانہ
تھکن کے بعد خاموش پناہ
(چٹان کے سینے میں ایک گھر)
میں
ایک ایسا گھر چاہتی ہوں
جو
نقشے میں نہ ہو
نہ فائلوں میں
نہ اجازت ناموں میں
چٹان کے سینے میں
ایک خاموش درز
جہاں
دیواریں نہیں
تحفظ بولتا ہو
جہاں
چولہے کا دھواں
کسی اعلان میں نہ ڈھلے
بس
سانس کی طرح
اوپر اٹھے
اور فضا میں
گم ہو جائے
جہاں
دروازہ بند کرنے کی ضرورت نہ ہو
کیونکہ
اندر خوف نہیں
اور باہر دشمن نہیں
مرغیاں
وقت بتائیں
کتا
ضمیر کی طرح
چوکنا رہے
اور میں
کسی کیلنڈر کے بغیر
زندہ رہوں
وہاں
رات
خبروں سے نہیں آئے
بلکہ
ندی کی آواز سے اترے
اور صبح
الارم سے نہیں
پرندے کی جنبش سے کھلے
میں
اس گھر میں
کم انسان
اور زیادہ روح ہونا چاہتی ہوں
جہاں
زندگی
روز ثابت نہ کرنی پڑے
چٹان کے سینے میں
ایک گھر
جہاں
میں
آخرکار
دنیا سے نہیں
خود سے مل سکوں۔